Megamiks

E, ak si zbog naslova mislite da bumo ovaj tjedan o narodnjačkim pjesmama koje su kak himna ovoj naciji, varate se. Ovaj put bumo opet o svemu i svačemu, jer je nekak prošli tjedan bilo jako puno svakakvih događanja, a svi su bili hit, pa bumo ih jednim imenom nazvali megamiks. I nema veze kaj nisu od istog autora jer se ipak nekak povezuju i od velkog su značaja za ovaj grad al i celu lepu našu koje je naš gradek dio.

Gradonačelnik nam je svojim odlaskom na kraju pokazal da jedan čovek ne čini grad, niti grad čini jedan čovek, jer lepo dalje mirno živimo, grad i dalje ima iste probleme i dugove, a on se psihički i fizički čist dobro osjeća. Sam vam lepo rekla da bu mu pasal preokret nakon kaj je iščekival svaki dan celi dan a bu ko pokucal. I dok gradska vlast naglašava da je sve vredu i da buju oni nastavili uhodane i ugovorene projekte (ko da se nekaj drugo i očekuje), ovih dana smo si pobegli u park gledat u zvezde i plesače, da malo pozabimo i odlutamo tam di je lepše.

Drvo po drvo…

I pak je naš park, iliti kak ga zoveju pluča grada, pokazal da je velka iako skrita zvezda v tom gradu: premalo živimo v njemu, osim onih kaj se tam ljubiju, pijeju, počivaju i šečeju pese. Zbog različitih razloga nisam bila na zvezdano-plesnim večernjim eventima, al mi je i popodne bilo tam jako lepo.

One plave i bele trakice kaj su visele z grana su dale neki posebni štih, kak živa pozornica na travi, pa muzikica koja je svirala na zvučnik i koju su poslušali zbunjeni ftiči, fontana nam je opet prodelala na najveću radost dece (već sam se pitala dal morti žaluje za kim pa su je zaprli, jer bi se i saki kvar i čišćenje već bil odavna završil). Žuti lampioneki, mali šatoreki s hranom i pijačom, i još su lepo pokosili travu, a znam jer mi je prije neki dan bila do pol lista (mojega, ne od drveta). Ma sve je bilo nekak tak lepo da milina. Pa si mislim, je da je struja skupa, i se troškove ugostitelja razmem, ali zakaj tak nekaj, ma sam jen mali dio toga, ne živi cele godine u parku? Nek zabiju drvenu kučicu od Ivice i Marice i nudiju čaj na jednom jurčeku kojega bu grad dal zabadava, jer da se razmemo, ni to neki trošak, a puno bi značilo nama glasačima.

I ja se sve češćem sednem na travu v park, ma nek mi vele da sam čudna, ionak svašta pišem. Kaj, ak pesi tam smeju pišati, morem i ja sedeti, pa makar na svoju odgovornost. Al tak mi je nekak lepo tam, malo kak da sam v Nju Jorku i Centralnom parku. No, tam se još i jede, i sedi, i čitaju knjige, i svira i popeva i pripoveda, i ima jezero i patke, a morti dok bum babica bu tak i pri nama. Mi zasad v parku sam plešemo, al i to je puno za ovaj grad jer mi se delamo mic po mic. Sadilo se ovih dana tam i drvo, kaj moram reći da je najlepši poklon koji mlada dama more dobiti za godišnicu. Sad umesto inače dislocirane drage on more dojti v park i grliti drvo, i rekli buju isto da je čudak, al ja bum si polek sedela na travici, pa buju nas dva. Lepo kak raste drvo, tak bu rasla i njihova veza (često zalevati!), a i daje im ne kamen neg drvo temeljac jer se spominamo o vezi na daljinu pa im je bar drvo na jenom mestu. Tak lepi, živi poklon nemre zameniti niti jen nakit nit bombonjera. Još pogotovo ak ženska više voli drvo od navedenog odma ju ženiti jer bu se lepo živelo z njom, onak i ekološki i ekonomski.

A ak nedaj Bog prekineju pak je dobro jer si niko drvo nemre zeti, ostalo bu na opče dobro, sam se nadam da neju urezivali psovke z nožem v njega. Zato se sam volite i pazite, jer ak bute vi dobro, bu i drvo, a mi bumo još dublje dihali v parku.

Gej iz okej

Kad smo kod nakita, si su pisali o gejevima, pa ja nem. To sam si mislila kad su bili v Splitu. Al kak se parada korektno ponovila u metropoli, sad se moram i ja deklarirati jer pravi kolumnist ne ignorira događaj kad se dvaput desi. Pa si razmišljam, kaj bum rekla jednog dana detetu, je bolje biti v pritvoru (napominjem, to još ni zatvor, tek su vrata priprta, al još ne zaprta) il biti gej, makar se te dve stvari po ničemu nedaju usporediti, al u glavama puno naših sunarodnjaka su iste i vredi ih kazniti. Kad se se povleče i sleče mislim da je na kraju sega bole da ste gej, jer to ne znači baš niš loše, nit se bi nas se druge trebalo ticati ono kaj svi veliju da je loše v tome.

A ak ste još k tome sretan v paru (a v pritvoru nemreš biti sretan i da očeš jer si navek v neparu i još si nekaj grdo zgrešil), onda ste morti na kraju sretnija osoba od puno strejt nesretnih brakova di imate razno razna maltretiranja, alkoholičare, kockare i se druge društvene bolesti koje rušiju ne sam familije neg i generacije. Ovih dana često zbog deteta sedim na zemli, a kad ste bliže zemli nekak ste bliže istini pa se gledite drukče. Stvarno ne razmem v čemu je problem s tim gejevima. Ja sam ne vidla nikakva čudovišta, alkoholičare, pedofile, ubojice, kriminalce v njima. Čak ih nit ne raspoznam, kaj bi se reklo da su normalni ljudi. I koji pa je njihov zločin. Ak dva odrasla čoveka pristaju biti skup i delati ono kaj se ionak nikog ne pita kaj dela v spavačoj sobi, kaj pa se mi tu imamo mešati.

Ima hetero njih kaj su bolesniji i koji rivleju sakam, da se razmemo, al to je ipak normalnije jer su strejt. Dal je ovca il je dete nema veze, bitno je da ni muško. Ovo z decom i ovcom jer meni najgorše kaj čovek more napraviti. I to se kazni jer je taj zločinac, al gej je bolesni i ostaje takav. A dok se pojave dve tete, to je lepo gledati pa si muški brzo dovlečeju stolce i s največom koncentracijom koju ste vidli bulje v njih kak mlada telad v šarena vrata. Pa dajte, najte. Jesmo zatucani, pa mislim da se bu to poglavlje v Europskoj uniji morti na kraju zaprlo po našim prstima, a v glavi bumo mi navek ostali na Balkanu. Je, brak je da se imaju deca, veliju oni kojima paše da su svi zgurani v tu instituciju.

Kak da svi parovi prakticiraju odnose uvek da delaju decu. Je, onda ne da ne bi stali v ovu našu domovinu neg bi živeli valda po granama drveta pa bi park konačno oživel. A većina pak lakše podnese tradicionalne, poznate i uhodane društvene bolesti kak su silovanja, maltretiranja, pedofile. To je isto ono kaj ne razmem, ak se zdravo hraniš il si vegetarijanec, si te gledaju kak da nisi normalan, al dok si neko vužge čik, je, to je vredu, pa to si znamo i razmemo.

Mladenec i mladenec = dete

Sad, kaj bumo z gejevima? Opče ne znam kaj se tu imamo spominati. Ljudi ko ljudi. Ja imam dost svojih greha da nemam čas skrivat se iza nekog drugog i vupirati z prstom il hitati kamene po njima. Lepo preporučam ovom našem konzervativnom društvu da se ne bore protiv njih kakti da su kakva pošast, bolest il pojava koje se treba rešiti, jer ih se ne buju rešili, i dalje ih bu i sretni buju v svojoj privatnosti.

Lepo ih treba prihvatiti, deti v društvene norme i legalizirati i nek oni isto imaju familije i plačaju porez. Jer ak se zmislite, ima puno ostavljene dece od strejt parova, koji su zbog toga normalni al su slučajno baš bili narkomani il alkoholičari il prostitutke il se skup jer z nečim se treba zalijat tableta i kupit droga, pa se nisu baš taj čas mogli brinuti za decu. Jer ak dete ima ljubav koju dobi i muški čovek ima ljubav koju mu neko (ma i muški) potrdi, ja bi rekla ne sam da je normalni, neg da je i jako sretni.

Lana Škvorc (www.lanaskvorc.com)

Vezane kolumne:

Otpelali su nam čupavca

Kad postaje osobno

Širenje krila na varaždinski način

Čušpajz, ne jedite ga vrućeg

Svakodnevni SF - pronaći slobodan dan za sebe

Varaždin, grad koji je spavao

Dani novih početaka

Proljetno čišćenje

Varaždinski klub knjiga